Xəbərlər

Tələbələrin yay düşərgəsi çərçivəsində “Şəhərsalma və Memarlıq: Gələcəyə Baxış” mövzusunda tədbir keçirilib

Sentyabrın 8-də Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqı Respublika Komitəsinin təşkilatçılığı ilə Xaçmaz rayonunda yerləşən “Təhsil” İstirahət Mərkəzində “Şəhərsalma və Memarlıq İli” çərçivəsində “Şəhərsalma və Memarlıq: Gələcəyə Baxış” mövzusunda tədbir keçirilib.

Tədbir Elm və Təhsil İşçiləri Həmkarlar İttifaqı Respublika Komitəsinin təşkilatçılığı ilə sentyabrın 7-dən 12-dək “Təhsil” İstirahət Mərkəzində keçirilən tələbə düşərgəsi çərçivəsində təşkil olunub.

Görüşdə Azərbaycan Memarlıq və İnşaat Universitetinin rektoru Gülçöhrə Məmmədova, Peşə Təhsili üzrə Dövlət Agentliyinin direktoru İlqar Bayramlı, Azərbaycan Texniki Universitetinin rektoru Vilayət Vəliyev, Bakı Mühəndislik Universitetinin rektoru Yaqub Piriyev, Azərbaycan Dövlət Pedaqoji Universitetinin rektoru Cəfər Cəfərov, Azərbaycan Əmək və Sosial Münasibətlər Akademiyasının rektoru vəzifəsini icra edən Fərid Babayev, Sumqayıt Dövlət Universitetinin rektoru Nurəli Yusifbəyli, Qarabağ Universitetinin rektoru Şahin Bayramov, Azərbaycan Neft və Sənaye Universitetinin rektoru Rüfət Əzizov, Bakı Slavyan Universitetinin rektoru Anar Nağıyev, Bakı Avrasiya Universitetinin rektoru Siyavuş Qasımov və 700 -ə yaxın ali təhsil, orta ixtisas və peşə təhsili müəssisələrinin tələbələri iştirak ediblər.

Tədbirdə Azərbaycan Respublikasının Dövlət Himni səsləndirildikdən sonra Ulu Öndər Heydər Əliyevin və Azərbaycanın ərazi bütövlüyü uğrunda şəhid olan qəhrəmanların əziz xatirəsi bir dəqiqəlik sükutla yad edilib.

Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə giriş sözü ilə çıxış edərək tədbirin məqsədi və “Şəhərsalma və Memarlıq İli”nin əhəmiyyəti barədə məlumat verib.

Daha sonra Elm və Təhsil İşçiləri Həmkarlar İttifaqı Respublika Komitəsinin sədri Araz Paşayev qonaqlara AHİK rəhbərliyinin səmimi salamlarını çatdırıb və son illərdə həmkarlar hərakatında görülən işlərdən danışıb. İl ərzində komitə tərəfindən həyata keçirilən yay və qış düşərgələri, forumlar, intellektual yarışlar, idman tədbirləri, təlimlər, ekskursiyalar, mədəni proqramlar, könüllülük təşəbbüsləri və sosial layihələrin məhz bu məqsədə xidmət etdiyini diqqətə çatdırıb.

ETİHİ Respublika Komitəsinin sədri onu da vurğulayıb ki, qarşıdakı illərdə bu cür düşərgələr ixtisasyönümlü olacaq və tələbələrin asudə vaxtlarının səmərəli keçirilməsi istiqamində daha innovativ layihələr həyata keçiriləcək. 

“Şəhərsalma və Memarlıq İli” çərçivəsində təşkil olunan tədbirin əsas məruzəçisi Azərbaycan Memarlıq və İnşaat Universitetinin rektoru, memarlıq doktoru, professor, Azərbaycan Respublikasının Əməkdar memarı Gülçöhrə Məmmədova şəhərsalma və memarlığın gələcəyi, müasir şəhər mühitinin formalaşdırılmasında yeni yanaşmalar və bu sahədə gənc mütəxəssislərin rolu barədə fikirlərini bölüşüb. Rektor çıxışında şəhərsalma və memarlıq sahəsində keyfiyyətli mütəxəssis hazırlığının vacibliyinə diqqət çəkib, tələbələri yeni biliklərə yiyələnməyə və yaradıcı düşüncəyə təşviq edib. Professor Gülçöhrə Məmmədova gənclərin gələcəkdə ölkənin şəhərsalma və memarlıq mühitinin inkişafına töhfə verəcəyinə əminliyini ifadə edib.

Peşə Təhsili üzrə Dövlət Agentliyinin direktoru İlqar Bayramlı öz çıxışında  Azərbaycan Həmkarlar İttifaqları Konfedrasiyasına tələbələr üçün yaradılmış şəraitə görə təşəkkürünü bildirərərək son illər peşə təhsilinə gənclərin marağının əvvəlki illərə nisbətən daha çox olmasından həmçinin peşə təhsili müəssiələrində yüksək ixitsaslı texniki mütəxəssislərin hazırlanmasından bəhs edib. 

Daha sonra qonaqlar “Təhsil” İstirahət Mərkəzində ittifaq üzvilərinə yaradılmış şəraitlə tanış olublar. Sonda tələbələrlə ali təhsil müəssisələrinin rəhbərləri xatirə fotosu çəkdiriblər.

Qeyd edək ki, düşərgə çərçivəsində tələbələr üçün intellektual yarışlar,futbol, voleybol, şahmat yarışları, foto və film müsabiqələri keçiriləcək.

ETİHİ üzvləri Müəllimlərin XXII Yay İdman Oyunlarını 6 medalla başa vurublar

Bolqarıstanın Albena şəhərində keçirilən Müəllimlərin XXII Yay İdman Oyunlarına yekun vurulub.

Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirak etdiyi beynəlxalq yarışlarda Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqının (ETİHİ) təmsilçiləri uğurlu nəticələr əldə ediblər.

ETİHİ təmsilçiləri yarışları 4 birincilik və 2 üçüncülük olmaqla, ümumilikdə 6 mükafatla başa vurublar.

Mini-futbol üzrə komandamız final görüşündə Polşa təmsilçisini 5:4 hesabla məğlub edərək turnirin qalibi olub.

Stolüstü tennis üzrə komanda yarışlarında qadınlardan ibarət komandamız 1-ci, kişilərdən ibarət komandamız isə 3-cü yeri tutub.

Qadınlar arasında stolüstü tennis üzrə fərdi yarışda Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbinin məşqçi-müəllimi Rüfət Əliyeva 1-ci, Xətai rayonu 56 saylı tam orta məktəbin müəllimi Xəyalə Qiyasova isə 3-cü yeri tutub. Şahmat üzrə fərdi yarışda isə Şəmkir rayonu Kimya və Biologiya Təmayüllü Liseyinin müəllimi Bünyad Əsgərov 1-ci yerə layiq görülüb.

Sonda qaliblər Bolqarıstan Müəllimlər Birliyinin prezidenti Yanka Takeva, Bolqarıstan Müstəqil Həmkarlar İttifaqları Konfederasiyasının vitse-prezidenti Todor Kapitanov, Bolqarıstan İşçilərinin İdman və Sağlamlıq Federasiyasının prezidenti, İşçilərin İdmanı üzrə Balkan Assosiasiyasının vitse-prezidenti Desislava Yagodin və Varna şəhərinin meri Blagomir Kotsev tərəfindən kubok və medallarla təltif olunublar.

Beynəlxalq yarış təhsil işçiləri arasında sağlam həyat tərzinin təşviqində, eləcə də həmkarlar ittifaqı üzvləri arasında dostluq və əməkdaşlıq əlaqələrinin inkişafında mühüm rol oynayır.

Qeyd edək ki, 2004-cü ildən etibarən keçirilən bu yarışlarda Ümummilli Lider Heydər Əliyevin anadan olmasının ildönümünə həsr olunmuş respublika idman yarışlarında yüksək nəticələr göstərərək seçilmiş ittifaq üzvləri iştirak edirlər.

ETİHİ üzvləri Müəllimlərin XXII Yay İdman Oyunlarında uğurla çıxış edirlər

Bolqarıstanın Albena şəhərində Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirakı ilə Müəllimlərin XXII Yay İdman Oyunları keçirilir.

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqının (ETİHİ) üzvləri də bu beynəlxalq yarışlarda iştirak edirlər.

Azərbaycan təmsilçiləri mini-futbol, stolüstü tennis, basketbol, çimərlik voleybolu və şahmat olmaqla 5 idman növündə mübarizə aparırlar.

Avqustun 27-28-də keçirilən yarışlarda ittifaq üzvlərimiz bir sıra uğurlu nəticələr əldə ediblər.

Mini-futbol üzrə komandamız qrup mərhələsini 6 xalla başa vuraraq yarımfinala yüksəlib. Yarımfinalda Bolqarıstanın “Vraça” komandasını 3:1 hesabı ilə məğlub edən təmsilçilərimiz finala vəsiqə qazanıblar.

Stolüstü tennis üzrə qadın və kişi komandalarımız da qrup mərhələsində keçirdikləri bütün qarşılaşmalarda qələbə qazanıblar. Qadınlardan ibarət komandamız 6 xalla, kişilərdən ibarət komandamız isə 8 xalla qrup mərhələsini lider kimi başa vuraraq final mərhələsinə yüksəliblər.

Şahmat üzrə fərdi yarışlarda Şəmkir rayon Kimya-biologiya təmayüllü liseyin müəllimi Bünyad Əsgərov I yeri tutub. O, həlledici qarşılaşmada Polşanın “ZNP” komandasının təmsilçisinə qalib gələrək yarışın qalibi olub.

Qeyd edək ki, Müəllimlərin Yay İdman Oyunları 2004-cü ildən etibarən ənənəvi olaraq hər il Bolqarıstanda keçirilir. Oyunlarda Ümummilli Lider Heydər Əliyevin anadan olmasının ildönümlərinə həsr edilən ölkədaxili idman yarışlarında yüksək nəticələr göstərərək münsiflər heyəti tərəfindən seçilən ittifaq üzvlərimiz iştirak edirlər.

Yarışlar avqustun 30-dək davam edəcək.

Sağlam psixososial iş mühitinin yaradılmasına həsr edilmiş təlim keçirilib

Təhsil İnstitutunun Həmkarlar İttifaqı Komitəsinin təşəbbüsü ilə aprelin 29-da “Sağlam psixososial iş mühitinin yaradılması” mövzusunda növbəti maarifləndirici təlim baş tutub. Təlim insan resurslarının idarə edilməsi sahəsində onillik təcrübəsi olan, “Azərpoçt” MMC-də insan resursları üzrə biznes tərəfdaşı vəzifəsində çalışan, “Yüksəliş” müsabiqəsinin eksperti Vüsalə İsmayılova tərəfindən həyata keçirilib.

İştirakçılar təlim çərçivəsində sağlam sosial mühitin əhəmiyyəti, təməl daşları, eyni zamanda sağlam sosial mühitə zərər verə biləcək amillər haqqında faydalı məlumatlar əldə ediblər. Oyunlar və interaktiv fəaliyyətlər vasitəsilə əldə olunan biliklər praktik təcrübə ilə möhkəmləndirilib.

ARTİ-də “Tədqiqat və akademik etika” adlı təlim keçirilib

Təhsil İnstitutunun Həmkarlar İttifaqı Komitəsi tərəfindən həyata keçirilən “Həmkardan həmkara öyrənmə” proqramı çərçivəsində 17 aprel 2026-cı il tarixində “Tədqiqat və akademik etika” mövzusunda növbəti təlim baş tutub. Təlim ARTİ-nin Təhsildə tətbiqi tədqiqatlar şöbəsinin müdiri Leyla Sultanlı tərəfindən həyata keçirilib.

Təlim çərçivəsində akademik dürüstlüyün pozulması halları, bu halların qarşısının alınması istiqamətində həyata keçirilməli olan tədbirlər, yırtıcı jurnallar barədə məlumat, eləcə də istifadə olunan mənbələrə tənqidi yanaşma kimi mühüm mövzular əhatə olunub. Təlim müddətində iştirakçılar nəzəri biliklərlə yanaşı, praktiki tapşırıqlara da cəlb ediliblər.

ARTİ Həmkarlar İttifaqı Komitəsi tərəfindən “Həmkardan həmkara öyrənmə” proqramının il ərzində davamlı olaraq həyata keçirilməsi nəzərdə tutulur.

ARTİ-də “Həmkardan həmkara öyrənmə” proqramı çərçivəsində növbəti təlim keçirilib

Təhsil İnstitutunun Həmkarlar İttifaqı Komitəsi tərəfindən həyata keçirilən “Həmkardan həmkara öyrənmə” proqramı çərçivəsində 11 martda “İş yerində “Canva”dan istifadə” mövzusunda növbəti təlim baş tutub. Təlim ARTİ-nin Təhsildə əməkdaşlıq və layihələrin idarə olunması şöbəsinin aparıcı mütəxəssisi, Qlazqo Universitetinin məzunu Nərgiz Məmmədova tərəfindən həyata keçirilib.

Təlim zamanı “Canva” platformasının əsas funksiyaları və ondan istifadə qaydaları iştirakçılara təqdim olunub. İştirakçılar “Canva” vasitəsilə təqdimat və hesabatların hazırlanması, müxtəlif şablonlardan istifadə və əsas dizayn prinsipləri haqqında məlumat əldə ediblər. Təlimin sonunda iştirakçılar praktiki tapşırıq yerinə yetiriblər. Ən yaxşı nəticə göstərən iştirakçı mükafatlandırılıb.

ARTİ Həmkarlar İttifaqı Komitəsi tərəfindən “Həmkardan həmkara öyrənmə” proqramının il ərzində davamlı şəkildə həyata keçirilməsi nəzərdə tutulur.

Təhsil İnstitutunun Həmkarlar İttifaqı Komitəsindən daha bir təşəbbüs

Təhsil İnstitutunun Həmkarlar İttifaqı Komitəsi əməkdaşlar arasında bilik və təcrübə mübadiləsini təşviq etmək məqsədilə “Həmkardan həmkara öyrənmə” proqramını davam etdirir.

Bu təşəbbüs çərçivəsində “Layihələrin idarə edilməsi” mövzusunda növbəti təlim baş tutub. Təlim proqramı ümumilikdə 4 təlim sessiyasından ibarət olub və 2, 9, 16, 25 fevral tarixlərində keçirilib.

Təlimi ARTİ-nin Milli və beynəlxalq qiymətləndirmə tədqiqatları şöbəsinin müdiri, PMP, PMI-ACP sertifikatlı Aygün Qurbanlı aparıb.

Treninq müddətində layihə anlayışı, məqsədlərin düzgün müəyyən edilməsi, maraqlı tərəflərin və rolların aydınlaşdırılması kimi ilkin mərhələlər praktik nümunələr əsasında izah edilib. Eyni zamanda planlama, vaxtın real bölüşdürülməsi və risklərin erkən müəyyən edilməsi ilə bağlı yanaşmalar iştirakçılara tətbiqi tapşırıqlar vasitəsilə öyrədilib. Layihələrin icrası zamanı effektiv kommunikasiya, dəyişikliklərin idarə olunması kimi mövzulara da toxunulub. Təlim iştirakçı layihələrinin təqdimatı və həmin təqdimatlar əsasında aparılan fikir mübadiləsi ilə yekunlaşıb.

ARTİ Həmkarlar İttifaqı Komitəsi tərəfindən “Həmkardan həmkara öyrənmə” proqramının il ərzində davamlı olaraq həyata keçirilməsi planlaşdırılır.

ARTİ və ADPU arasında əməkdaşlıq haqqında Memorandum imzalanıb

Fevralın 23-də Azərbaycan Respublikasının Təhsil İnstitutunda Azərbaycan Dövlət Pedaqoji Universitetinin rəhbər heyəti ilə görüş keçirilib.

ARTİ-nin direktoru vəzifəsini müvəqqəti icra edən Elnur Əliyev və ADPU-nun rektoru, professor Cəfər Cəfərovun rəhbərlik etdiyi nümayəndə heyətləri iki qurum arasında əməkdaşlıq perspektivlərini müzakirə ediblər. Müzakirə əsnasında magistrantlar üçün dissertasiya mövzularının müəyyənləşdirilməsi, magistr tədqiqatlarının nəticələrinin paylaşılması və bu nəticələrin müvafiq sahələrdə tətbiq edilməsi, təhsil pillələri arasında müvafiq keçidlərin təkmilləşdirilməsi, biliyin ölçülməsində dünya təcrübəsi, pedaqogika sahəsində ixtisaslaşmalar üzrə müasir məzmunun tətbiqi və təhsil proqramlarının yenilənməsi, universitetin müxtəlif regionlardakı filiallarının insan resurslarının və maddi-texniki bazasının ortaq tədqiqatlarda istifadəsi və digər mövzulara toxunulub.

Görüşün sonunda ARTİ və ADPU arasında Memorandum imzalanıb. Sənədi imzalayan Elnur Əliyev və Cəfər Cəfərov gələcək əməkdaşlığa böyük ümid bəslədiklərini və bu əməkdaşlığın hər iki qurumun fəaliyyətinə müsbət təsir edəcəyinə inandıqlarını vurğulayıblar.

ARTİ Həmkarlar İttifaqı Komitəsinin təşəbbüsü ilə Təhsil İnstitutunda master-klas keçirilib

Azərbaycan Respublikasının Təhsil İnstitutunda (ARTİ) 14 Fevral Beynəlxalq Kitab Bağışlama Günü münasibətilə ARTİ Həmkarlar İttifaqı Komitəsinin təşəbbüsü ilə tədbir keçirilib.

Tədbir əməkdaşlar arasında kitab oxuma mədəniyyətinin təşviqi, kitab mübadiləsi ənənəsinin formalaşdırılması, həmçinin iştirakçıların həmkarları ilə birlikdə yaradıcı və səmərəli vaxt keçirməsinə şərait yaratmaq məqsədilə təşkil olunub.

Tədbirdə iştirak edən əməkdaşlar əlfəcin master-klasında bir-birindən maraqlı əlfəcinlər hazırlayıblar, oxuduqları kitablar haqqında danışıblar. Əməkdaşlar öz aralarında kitab mübadiləsi də ediblər. İşçi qruplar mütaliənin vacibliyi və təbliği mövzularında müzakirələr aparıblar.

Qeyd edək ki, tədbir ARTİ-nin Əlavə təhsilin təşkili şöbəsinin mütəxəssisi Sevil Məlikzadənin rəhbərliyi ilə həyata keçirilib.

“Həmkardan həmkara öyrənmə” proqramı çərçivəsində növbəti təlim baş tutub

Təhsil İnstitutunun Həmkarlar İttifaqı Komitəsi əməkdaşlar arasında bilik və təcrübə mübadiləsini təşviq etmək məqsədilə “Həmkardan həmkara öyrənmə” proqramına davam edir.

Proqram çərçivəsində ARTİ-nin müxtəlif struktur bölmələrinin mütəxəssisləri öz peşə bacarıqlarını və biliklərini digər həmkarları ilə mütəmadi şəkildə paylaşmaq imkanı qazanırlar.

Bu təşəbbüs çərçivəsində 2 fevralda “Layihələrin idarə edilməsi” mövzusunda növbəti təlim baş tutub. Təlim ARTİ-nin Milli və beynəlxalq qiymətləndirmə tədqiqatları şöbəsinin müdiri, PMP, PMI-ACP sertifikatlı Aygün Qurbanlı tərəfindən həyata keçirilib.

Təlimdə layihə anlayışı, layihələrin uğursuzluğunun əsas səbəbləri, məqsədin düzgün müəyyən edilməsi, əhatə dairəsi və gözləntilərin idarə olunması kimi mövzular müzakirə olunub. Eyni zamanda, real nümunələr əsasında maraqlı tərəflər və onların rolları aydın şəkildə müəyyənləşdirilib.

Bu təlimin əsas məqsədi iştirakçılarda layihələrin effektiv təşkili və idarə olunması üzrə bacarıqların formalaşdırılmasıdır. Həmçinin, layihə proseslərində planlaşdırma, maraqlı tərəflərlə səmərəli əməkdaşlıq və risklərin qabaqlayıcı şəkildə idarə edilməsi bacarıqlarının inkişaf etdirilməsi də təlimin əsasını təşkil edən məsələlərdən olub.

Təlim proqramı ümumilikdə 4 təlim sessiyasından ibarətdir. Qeyd edək ki, ilk sessiya 2 fevral tarixində həyata keçirilib, növbəti sessiyaların 9, 16, 21 fevral tarixlərində həyata keçirilməsi planlaşdırılır.

ARTİ Həmkarlar İttifaqı Komitəsi tərəfindən “Həmkardan həmkara öyrənmə” proqramının il ərzində davamlı olaraq həyata keçirilməsi planlaşdırılır.

“Komanda quruculuğu” istiqamətində növbəti tədbir həyata keçirilib

Azərbaycan Respublikasının Təhsil İnstitutu və Azərbaycan Respublikasının Təhsil İnstitutu Həmkarlar İttifaqı Komitəsinin birgə təşkilatçılığı ilə ARTİ əməkdaşları üçün “Komanda quruculuğu” istiqamətində növbəti tədbir həyata keçirilib.

22 noyabr tarixində Təhsilverənlərin Peşəkar İnkişafı Mərkəzi və Metodik Dəstək Mərkəzinin, 29 noyabr tarixində isə Elmi-Pedaqoji Tədqiqatlar Mərkəzinin əməkdaşları üçün “Komanda quruculuğu” istiqamətində səhər yeməyi təşkil olunub.

Tədbirdə ARTİ-nin rəhbər heyətindən direktor müavinləri İlham Cavadov və Kənan Kərimli, Elmi-pedaqoji kadrların hazırlanması şöbəsinin müdiri, pedaqogika elmləri doktoru, professor Hümeyir Əhmədov, həmçinin ARTİ HİK sədri Leyla Sultanlı çıxış ediblər. Bununla yanaşı, müxtəlif struktur bölmələrdən olan əməkdaşlar da fikir və təkliflərini bölüşüblər.

Tədbirlərin əsas məqsədi əməkdaşlar arasında sosial əlaqələrin gücləndirilməsi, müsbət və əməkdaşlığa əsaslanan münasibətlərin təşviqi, həmçinin işdən kənar zamanlarda həmkarlar arasında daha səmimi və motivasiyaedici mühitin yaradılması olub.

Proqram çərçivəsində iştirakçılar üçün səhər yeməyi təşkil edilib, ardınca musiqi fasiləsi ilə müşayiət olunan qeyri-rəsmi ünsiyyət mühiti yaradılıb. Səmimi atmosfer ARTİ əməkdaşlarının bir-biri ilə daha yaxından tanış olmasına, komanda ruhunun güclənməsinə və müsbət iş mühitinin formalaşmasına töhfə verib.

ARTİ Həmkarlar İttifaqı Komitəsi “Həmkardan həmkara öyrənmə” proqramına start verib

Azərbaycan Respublikasının Təhsil İnstitutunun Həmkarlar İttifaqı Komitəsi əməkdaşlar arasında bilik və təcrübə mübadiləsini təşviq etmək məqsədilə “Həmkardan həmkara öyrənmə” proqramına start verib. Proqram çərçivəsində ARTİ-nin müxtəlif struktur bölmələrində çalışan mütəxəssislər öz peşə bacarıqlarını və biliklərini digər həmkarları ilə mütəmadi şəkildə paylaşmaq imkanı qazanacaqlar.

Bu təşəbbüs çərçivəsində 20 noyabrda “İş yerində ünsiyyət və emosiyaların idarə olunması: Emosional zəka və kouçluq yanaşması” mövzusunda ilk təlim keçirilib. Təlim ARTİ-nin Peşə və ömürboyu təhsil şöbəsinin müdiri, beynəlxalq akkreditasiyalı peşəkar kouç Xanım Şabonova tərəfindən aparılıb.

Təlimin əsas məqsədi əməkdaşların iş mühitində effektiv ünsiyyət bacarıqlarını gücləndirmək, çətin emosional vəziyyətləri düzgün idarə etməkdə əməkdaşlara dəstək olmaq, ümumilikdə pozitiv komanda ruhunu artırmaqdan ibarət olub.

Təlimdə Təhsil İnstitutunun əməkdaşları iştirak edib və təlim boyunca emosional zəka, özünü tanıma, motivasiya kimi mövzular ətrafında müzakirələr aparılıb.

ARTİ Həmkarlar İttifaqı Komitəsi tərəfindən “Həmkardan həmkara öyrənmə” proqramının davamlı olaraq həyata keçirilməsi planlaşdırılır.